1. Даралтын нөлөөнд хялбархан автдаг, хэлбэр дүрсээ алдамтгай чанар, хатуу нягт биш зүйл: зөөлөн мод (а. Зорох, сийлэхэд хялбар мод; б. Нугалахад уян хатан мод), зөөлөн төмөр (хат багатай төмөр, махан төмөр), зөөлөн үс (уян налархай үс), зөөлөн чулуу (хат багатай элэгдэмтгий чулуу), зөөлөн цэрд (болсон цэрд, болсон шохой) - Зөөлөн цагаан цэрдээр зөндөө л тоо бичжээ. Б.Жамц. Сэтгэлийн нууц., зөөлөн эдлэл (үслэг арьс, бөсөөр хийсэн эдлэл), зөөлөн намуун [хоршоо] (аядуу дөлгөөн), зөөлөн харимхай [хоршоо] (уян налархай), зөөлөн хатуу [хоршоо] (юмны эсрэг тэсрэг шинж) - Түүнээс Тайзу Хэрэйдийн нутаг усыг үзсээр тэр жилийн зөөлөн хатуугийн зургаан жагсаалыг хэлэлцэж… В.Инжаннаши. Хөх судар;

---

2. Даагдах дийлдэх нь амар - Хаварт бороо цас орсны дараа харганын хальс дэвтэж зөөлөн болно. Ж.Самбуу. Мал маллагааны арга туршлага., зөөлөн хоол (идэхэд хялбар хоол), *зөөлөн боорцог биш (а. Амар хялбар арганд орох, дийлдэх хүн биш; б. Хэцүү ажил);

---

3. Эелдэг зан ааш, аливаад сэтгэл амархан уярах нь: сэтгэл зөөлөн (сэтгэл уян), *зөөлөн мөлжүүр (хүний аяар байх зан), зөөлөн бөх (нойр) - Үе үе хоёр өвгөдийн дүнгэр дүнгэр ярилцах нь чихэнд тусавч өдрийн тулаанд ядраад “зөөлөн бөхөд” дийлдэж, нэг хэсэг ухаан мэдээгүй унтацгаав. Б.Ринчен. Заан залуудай., зөөлөн нүд (дөлгөөн харцтай нүд) - Солонгод Итгэлтийн гэр бүлийн хэнд ч байхгүй зөөлөн нүд дөлгөөн харц байв. Ч.Лодойдамба. Тунгалаг Тамир., зөөлөн харц (дөлгөөн харц), зөөлөн хүн (ааш зан эелдэг даруу хүн) - Бадмаа эрдэм боловсролгүй гэлээ ч амьдралын хар ухаан эрт суусан тун янаг зөөлөн ааштай хүн билээ. С.Эрдэнэ. Өгүүллэгүүд., урин зөөлөн [хоршоо] (а. Цаг агаарын аятай таатай байдал; б. Сэтгэл ялдам, өр нимгэн зан), уян зөөлөн [хоршоо] (аядуу, энэрэнгүй зан ааш);

---

4. Хөнгөн хялбар, амархан: зөөлөн ажил (амар ажил), зөөлөн оёдол (хялбар оёдол), зөөлөн мэх (энгийн мэх) - Сайн бөх нь зөөлөн хөдөлсөн хүнд зөөлөн мэх хийдгийг гэрчилж байна. Ж.Дамдин. Монгол бөх;

---

5. Тав тухтай, биед эвтэйхэн - Агтны хазаарыг амгайчилж аяар зөөлөн яв. Монголын нууц товчоо., зөөлөн суудал (а. Суухад хатуу биш, аятай суудал; б. Галт тэрэгний тусгай тохижуулсан тасалгаа; в. [шилжсэн] Дээгүүр албан тушаал);

---

6. Ялгуум, аяархан: зөөлөн болох (аядуу намдуу болох), зөөлөн бороо (шиврээ бороо, зүсэр бороо), зөөлөн салхи (аядуу дулаан салхи; сэвшээ салхи);

---

7. [хэл шинжлэл] Өгүүлэх, дуудахад зөөлөрч хэлэгдэх гийгүүлэгч авиалбар: зөөлөн гийгүүлэгч (хэлэхэд өгүүлэх эрхтэн сул хэлэгдэх гийгүүлэгч, хэлний дунд этгээд тагнайд ойртон хэлэгдэнэ), зөөлний тэмдэг (цагаан толгойн «ь» тэмдэг).