Хэвлэх


2025-10-23 05:06:40http://mongoltoli.mn/

ДУСАЛ

1. Шингэн юмны жижиг мөхлөгөөр унасан бөөрөнхий хэсэг: усны дусал (усны жижиг мөхлөг) - Ой зөөлхөн шуугьж, хаа нэгтээ усны дусал дусна. Д. Гармаа. Уулс өвгөрөх цаг., дуслыг хураавал далай болно, дуулсныг хураавал эрдэм болно [зүйр цэцэн үг] (өчүүхэн багаас их юм үүсдэг гэсэн санаа), алтан дусал [ургамал] (хоёр гурван давхар хэлтэстэй, улбар шар цэцэгтэй, навч цэцэгт нь тунасан шүүдэр шороонд дусвал даруй үндэс ургах, горхи, гуу, уулын хажуугаар ургадаг сараанатан овгийн олон наст өвс) - Уулын таг сарьдгаар хэрэв явбал одой хуш ногоорч, агдар ургасан царманд алтан дусал найгаж үзэгдэх нь сонин билээ. Д. Гармаа. Уулс өвгөрөх цаг;


2. [шилжсэн] Бадар, гуйлга: дуслын лам (өглөг хандив хураах лам) - Баруун сүмийн хувилгаан миний нагац юм байна, банзал чирсэн дуслын лам чиний нагац билүү дээ. Дайралцаан;
3. Нэгэн зүйл эмнэлгийн тариа: дусал хийх (тариаг хүний судсанд дуслаар хийх), дусал залгах (дуслаар хийх тарианы зүүг судсанд холбох), дуслын тариа (хүний биед дуслаар аажим оруулах тариа);
4. Монгол бичгийн ялгах цэг тэмдэг: ᠨᠠ‍ - гийн дусал (на үсгийн н гийгүүлэгчийг ялгах цэг тэмдэг), ᠭᠠ‍ - гийн дусал (га үсгийн г гийгүүлэгчийг ялгах цэг тэмдэг), дусал бинт [хоршоо] (манж хэлний цагаан толгойн үсгийн дээр доор тавих цэг тэмдэг).

--oOo--