1. Асуусанд хэлэх үг, өгөх мэдээ: хариу захидал (ирсэн захианд хариулж бичсэн захидал) - Тэднийг тийнхүү Ардын засагт хүчин зүтгэх хүсэлтэй байгааг мэдэхдээ жанжин Сүхбаатар хариу захиа илгээжээ. Л.Түдэв. Хувьсгал танаа өчье., хариу үг (асуусанд буцааж хэлэх үг), хариу хэлэх (асуусанд буцааж үг хэлэх); ацан хариу (хоёр утгатай хариу), бардам хариу (үнэн зөвд нь эргэлзээгүй хариу), бодолтой хариу (ихэд нухацтай бодож тунгаасны эцэст гарсан хариу), боломжтой хариу (бололцоотой, байж болох үг), егөөдсөн хариу (шоглосон өнгө аяс бүхий хариулт), нааштай хариу (сайн хариу), найрсаг хариу (найр тавьсан хариу, элэгсэг хариу), оновчтой хариу (хэрэг зүйд яг тохирсон хариу), татгалзсан хариу (эс зөвшөөрсөн хариу), товчхон хариу (хураангуй буюу нэг хоёр үгээр хэлсэн хариу), тодорхойгүй хариу (тод бус, илэрхий бус хариу), төгс хариу (хамгийн сайн хариу), утгагүй хариу (нөхцөл байдалдаа тохироогүй хариу), ухаантай хариу (ухаалаг хариу болгон хэлсэн үг), учрыг нь олохгүй хариу (юу гэсэн утгатай нь мэдэгдэхгүй хариу), үгний хариу (хүний хэлсний хариу), хангалтгүй хариу (хариу хүсэгчийн сэтгэлд хүрээгүй хариу), шазруун хариу (омголон, шаралхсан хариу), эрс тэс хариу (эсрэг тэсрэг хариу, хоёр өөр хариу), эс зөвшөөрсөн хариу (үл дагаж нийлэх хариу, үл ойшоон дагалдах хариу), яаралтай хариу (хурдан хугацааны дотор хэлэх ёстой, дуулгах ёстой хариу);

---

2. Юмны хариулал, буцаж ирэх үр дүн - Хар зандан хатан ээж нь зуун манхан тэмээний бурантгийг хариу эргүүлээд гарав л. Монгол ардын баатарлаг тууль., хариу авах (а. Өшөө авах; б. Асуусан лавласны шийдвэр авах), хариу арга хэмжээ (ямар нэг үйлдэл хийсний төлөө буцааж авах арга хэмжээ), хариу айлчлал (зочин ирээд буцсаны дараа хүндэтгэл болгож тэднийд айлчлах нь), хариу өгөх (а. Лавласан юмны шийдвэрийг хэлэх; б. Өглөг, тусламжийн орыг нь өгөх), хариу тэмдэг (авсныг бичиж буцаах тэмдэг), хариу үг (буцааж хэлэх үг), хариу цохилт (буцааж хийх дайралт), хариу санах (тусын хариу горилох), хариу хэлэх (асуусан зүйлд хариулах) - Уралдаж байгаа мэт ухаан жолоогүй гүйлдэж яваа хүмүүс хариу хэлэх байтугай дуулах ч сэхээгүй дэгдэн алга болов. Д.Намдаг. Цаг төрийн үймээн., *аяганы хариу барих (хариу талархах, талархсан сэтгэлээ илэрхийлж ямар нэг юм өгөх), аяганы хариу өдөртөө, агтын хариу жилдээ [зүйр цэцэн үг] (хүнд тус болбол сайн үйлийн үр заавал эргэж өөрт ирдэг гэсэн санаа).