1. Хаана, аль газар гэж асуух үг: хаа газар (аль газар) - Хаа газраас ирсэн хүний үр вэ? Л.Ванган. Сэрэлт., хаа нэгтээ (аль нэг газарт) - Хаа нэгтээ уяж хоносон морьд үүрсэх сонстоно. Л.Дашням. Бурхантын цэцэг., хаа хамаагүй (а. Хаашаа ч хамаагүй, хаана ч хамаагүй; б. Шал өөр, тэс ондоо), хаа хаашаа (тал бүр тийш), хаа хүртэл (аль хүртэл), хаа ч байтугай (хааяагүй, энд тэндгүй, газар сайгүй), хаа ч өөрцгүй (хаана ч байсан адил), хаа хаанаа (аль аль талдаа) - Та бид хаа хаанаа дайн дажингүй суувал тун сайхан сан. С.Удвал. Их хувь заяа., хаа ч үгүй хаахайсан толгой [үл таашаасан] (эрхэлсэн ажилгүй, хийж бүтээсэн зүйлгүй мөртөө бардамнаж биеэ дөвийлгөсөн зантай хүн);